Pro-liga 12-turidan o‘rin olgan "Dinamo" — "Mash’al" (2:0) uchrashuvidan so‘ng mehmonlar bosh murabbiyi Asror Aliqulov matbuot anjumanida ishtirok etdi.

O‘yin haqida
— Gol o‘tkazib yuborganimizdan so‘ng vaziyatni o‘nglash uchun oldinga intildik. Vaziyatlar yaratdik, golga tortadigan qulay imkoniyatlarimiz ham bo‘ldi. Afsus, o‘yin oxirida uzoq masofadan berilgan zarbadan so‘ng ikkinchi to‘pni o‘tkazib yubordik. Bitta to‘p farqi bilan yutqazayotgan vaqtimizda vaziyatlarimizni golga aylanganida balki ochko bilan qaytishimiz mumkin edi.

— Jamoa sizning qo‘l ostingizda ikki Superligaga da’vogar klub — "Dinamo" va "Qo‘qon-1912" bilan o‘ynadi. Ushbu o‘yinlardan qanday xulosalar oldingiz?
— Bizga stabillik kerak. Tarkibida kuchli futbolchilar jam bo‘lgan klublar bilan o‘ynadik. Men hozir jamoada yangi murabbiyman, tarkibni to‘liq o‘rganib, imkoniyatlarni chamalab olish uchun vaqt kerak.

— Ketma-ket 2 mag‘lubiyatdan so‘ng jamoani Superligaga chiqish imkoniyatlarini qanday baholaysiz?
— Albatta, oxirigacha kurashamiz. Oldinda imkoniyatlarimiz bo‘ladi. Hech qaysi jamoa ochko yo‘qotmaydi deb kafolatlanmagan. Hozir oson o‘yinlarning o‘zi yo‘q. Oldimizda Superliga vazifasi bor, oxirigacha harakat qilamiz.