Rossiya va Bahrayn terma jamoalari 2023 yilda o‘rtoqlik o‘yini o‘tkazmaydi.
Bu haqda Bahrayn futbol assosiasiyasining texnik direktori lavozimini egallab turgan Abed Al Ansoriy aytib o‘tdi.
Avvalroq Rossiya futbol ittifoqi Bahraynga qarshi ehtimoliy o‘yin bo‘yicha muzokaralar haqiqatan ham davom etayotganini ma’lum qilgandi.
«Sentyabr va oktyabr oylarida biz boshqa jamoalar bilan o‘yin o‘tkazishga kelishib oldik. Bu yilgi Rossiya bilan o‘yin natija bermayapti, chunki noyabr oyida Bahraynda jahon chempionatiga saralash o‘yinlari bor va termamiz bosh murabbiyi ulardan oldin Osiyo termalari bilan o‘ynashni istaydi», - dedi Al Ansoriy.
Aytish joizki, sanksiyalar tufayli Rossiya terma jamoasi hozircha faqat o‘rtoqlik o‘yinlari o‘tkazishi mumkin.
Valeriy Karpin jamoasi so‘nggi bor mart oyida yig‘in o‘tkazgan, o‘shanda u Eron bilan durang o‘ynagan (1:1) va Iroqni mag‘lub etgan (2:0).
