«Tottenxem» klubi Harri Keyn «Bavariya»ga ketganidan so‘ng yangi hujumchi sotib olish imkoniyatini o‘rganmoqda.
The Telegraph xabariga ko‘ra, «shporlar» rahbarlari «Nottingem Forest» yetakchilaridan biri Brennan Jonsonning transferiga tayyorgarlik ko‘rmoqda.
Xabar qilinishicha, «o‘rmonchilar» uelslik hujumchini 50 million funtga sotishga intilishmoqda, chunki klub moliyaviy feyr-pley bilan bog‘liq muammolarga duch kelishi mumkin. Avvalroq Jonsonning o‘zi ham yaqinlarini Londonga ko‘chib o‘tishi haqida ma’lum qilgandi.
Eslatib o‘tamiz, Brennan Jonson 2019 yildan buyon «Nottingem Forest»da o‘ynab kelmoqda. Hujumchi o‘tgan mavsumda barcha turnirlarda 44ta o‘yinda maydonga tushib, 10ta gol urgan. 22 yoshli futbolchining narxi 38 million yevroga baholanmoqda.
