O‘zbekiston kubogining chorak finalidan o‘rin olgan “Navbahor” – “Surxon” o‘rtasidagi uchrashuv arafasida “lochinlar”ning 31 yoshli tajribali yarim himoyachisi Azimjon Ahmedov bo‘lajak o‘yin haqidagi fikrlari bilan o‘rtoqlashdi.

"So‘zim avvalida barcha yurtdoshlarimizni O‘zbekiston mustaqilligining 32 yillik bayrami bilan tabriklayman va ularga Vatanimiz mustaqilligini mustahkamlash yo‘lidagi faoliyatlarida omad yor bo‘lishini tilayman.

Bo‘lajak bahs borasida to‘xtaladigan bo‘lsam, joriy mavsumda uchta frontda kurash olib borayotgan hamda barcha musobaqalarda o‘z oldiga yuksak maqsadlar qo‘ygan jamoamiz uchun endi buyog‘iga o‘tkaziladigan har bir o‘yin finalga teng. Albatta, O‘zbekiston kubogi bahslari ham bundan mustasno emas.So‘nggi uchrashuvlarda ijobiy natija qayd eta olmay, muxlislarimizni biroz ranjitib qo‘ydik.SHu bois, bo‘lajak bellashuvda g‘alaba qozonib, ishqibozlarga quvonch ulashgan holda, yarim final yo‘llanmasini qo‘lga kiritishga harakat qilamiz hamda buni amalga oshirish uchun barcha imkoniyatimizni ishga solamiz. Boisi, ta’kidlaganimdek, joriy mavsumda O‘zbekiston kubogini ham qo‘lga kiritishni niyat qilganmiz va inshoolloh, buni uddalaymiz.

Muxlislardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.

Ertangi o‘yindan so‘ng, ishqibozlar uylariga yaxshi kayfiyatda qaytishlari uchun biz – futbolchilar qo‘ldan kelganicha harakat qilamiz", — dedi Azimjon Ahmedov.

“Navbahor” PFK matbuot xizmati.