Saudiya Arabistoni klubi delegasiyasi "Liverpul"ni Muhammad Salohni sotishga ko‘ndirish uchun Londonga yetib keldi.

"Liverpul" o‘tgan payshanba kuni "Al-Ittihod"ning Salohni sotib olish bo‘yicha 150 million funtlik taklifini rad etdi. O‘shandan beri "qizillar" bosh murabbiyi Yurgen Klopp Muhammad Saloh hech qayerga ketmasligini bir necha bor aytgan edi.

Biroq, "Al-Ittihod" Salohning o‘zi bu transferga ochiq ekanligiga ishonch bildirmoqda. Shu bois Saudiya klubi o‘z vakillarini muzokaralar uchun Londonga yubordi.

Daily Mail nashri xabariga ko‘ra, saudiyaliklar 31 yoshli misrlik futbolchi uchun taklifni yaqin 48 soat ichida 200 million funtga oshirishlari kutilmoqda.

Saudiya Arabistoni seshanba kunigacha Saloh bo‘yicha muzokaralarda muvaffaqiyat qozonishga umid qilmoqda. Aks holda, "Al-Ittihod" payshanba kuni transfer oynasi yopilishidan oldin muqobil maqsadlarga o‘tadi.