"Real" futbolchisi Dani Karvaxal "Selta" futbolchisi Gabri Veyganing Ispaniya chempionatini tark etib, Saudiya Arabistoni klubiga o‘tish haqidagi qaroriga izoh berdi.
“Al-Ahli”ning saxovatli taklifiga vasvasaga tushgan Veyga tanqidlar nishoniga aylandi – ko‘pchilikning fikricha, “Real” ham qiziqqan umidli futbolchi Yevropadagi faoliyatiga nuqta qo‘ydi. Xususan, Veyganing tanlovi “Los-Blankos” faxriysi Toni Kroos tomonidan tanqid qilindi, ammo Karvaxal yosh futbolchining bu qarorini tushunishga chaqirdi.
“U 21 yoshda edi. Bunday foydali taklifni olganingizda tanlov qilish qanchalik qiyinligini juda yaxshi tushunaman. Germaniyaga borganimda besh yillik shartnoma tuzdim va birinchi qilgan ishim ota-onamga uy sotib olish bo‘ldi. Men kambag‘al hududdan kelganman, shuning uchun uning qarorini tushunaman", - deya Karvaxalning so‘zlarini keltiradi AS.
