«Liverpul» yarim himoyachisi Dominik Soboslai faoliyatida uning otasi, sobiq futbolchi Jolt hamisha muhim rol o‘ynaydi.
Deylik, shaxsiy futbol akademiyasiga asos solgan katta Soboslai o‘g‘li bilan tinimsiz shug‘ullangan, uning yuqori darajaga chiqishini ta’minlash yo‘lida ba’zi g‘alati medotikalarga qo‘l urgan...
Oddiy misol, katta Soboslai mashg‘ulotlar jarayonida Dominikning qo‘llari hamisha band bo‘lishini istagan. Shunga muvofiq, «Liver-pul»ning yangi futbolchisi yoshligidan ikki qo‘lida golf to‘pchasini tutgancha yugurgan. Buning mohiyati oddiy - mashg‘ulotlarda raqibni futbolkasidan tortish yoki yana qandaydir texnik yechimga o‘rganib qolmaslik. Soboslailar oilasiga yaqin manbaning The Athletic nashriga oshkor etishicha, u o‘g‘lini istiqbolli futbolchi sifatida shakllantirish uchun yana bir g‘alati tushunchaga to‘liq amal qilgan. Oddiy aytganda, Dominik bolaligidan otasi qistovi bilan o‘z o‘lchamidan biroz kichikroq poyafzal kiyishga majbur edi. Chunonchi, ota «Odamning oyog‘i qancha kichik bo‘lsa, undan kuchli futbolchi chiqish ehtimoli shuncha oshadi» qabilidagi fikrga to‘liq ishongan. Ushbu tushunchaga ko‘ra, oyoq qanchalik kichik bo‘lsa, to‘pni nazorat qilish shuncha osonlashadi.
Xullas, futbolcha layf-xak. «Katta oyoqlar bilan to‘pga mukammal zarba berolmaysan, agar Ibragimovichdek ijro mahoratini o‘zlashtirmagan bo‘lsang, - deya izohladi manba. - To‘pni to‘g‘ri yo‘llash uchun nisbatan uzunroq, lekin kichik oyoqlar kerak. Dominikning otasi shuning uchunmi, bu borada o‘ta qat’iy turgan va uni hamisha kichikroq o‘lchamdagi poyafzalda yurishga majburlagan. Endi buning samarasiga qarang». Kichik oyoqlar futbolda qanchalik yordam berishi ilmiy jihatdan isbotlanmagan, ammo haqiqat shuki, «Liverpul» yarim himoyachisi o‘z ishini a’lo darajada bajarmoqda hozircha.
