Jalolobod shahrida "Muras Yunayted" va "Andijon" jamoalari oʻrtasida oʻrtoqlik uchrashuvi boʻlib oʻtdi. Ushbu bahs oldidan OʻFA birinchi vitse-prezidenti Ravshan Irmatov Qirgʻiz futbol ittifoqi prezidenti Mederbek Sidiqov bilan uchrashdi.
Dastlab Ravshan Irmatov mamlakatlarimiz oʻrtasida yaqin qardoshlik, qoʻshnichilik aloqalari hamda futbolni rivojlantirish borasida harakatlar yangi bosqichga chiqqanidan mamnun ekanligini bildirdi. Oʻz navbatida, Qirgʻiz futbol ittifoqi rahbari Mederbek Sidiqov yangi istiqbolli loyihalarni birgalikda amalga oshirishga tayyor ekanligini aytdi.
Uchrashuv davomida ikki davlatda futbolni rivojlantirish va ommalashtirish, oʻzaro tajriba almashish, futbol assotsiatsiyalari oʻrtasida har tomonlama hamkorlikni yoʻlga qoʻyish masalalari keng muhokama qilindi. Tadbir davomida tomonlar oʻrtasida memorandum imzolandi.
Memorandumda ikki mamlakat jamoalari hamda klublari ishtirokida xalqaro musobaqalar va oʻrtoqlik uchrashuvlarini tashkil etish boʻyicha bandlar mavjud. Murabbiylar, hakamlar va yana qator yoʻnalishlar boʻyicha futbol mutaxassislarini tayyorlash uchun almashinuv dasturlarini ishlab chiqish, bolalar futbolini rivojlantirishga koʻmaklashish nazarda tutilgan.