Pro liganing 17-turidan o‘rin olgan “Navbahor-farm” – “Sho‘rtan” (2:1) uchrashuvidan keyingi matbuot anjumanining birinchi qismida mehmonlar bosh murabbiyi Anvar Berdiyev qatnashib,jurnalistlarning savollariga javob berdi.

G‘uzorliklar ustozi odatdagidek, o‘z so‘zini o‘yin haqidagi fikrlari bilan boshladi.

- Bugungi g‘alaba bilan “Navbahor-farm” jamoasini tabriklayman. Teng kurashlar ostida bo‘lib o‘tgan bahsda alamli tarzda mag‘lubiyatga uchradik va bunda barcha aybni o‘z bo‘ynimga olaman. O‘z oldiga vazifa qo‘yilgan jamoa bunday o‘ynamasligi kerak edi. Endi ushbu bellashuvdagi xatolarni ko‘rib chiqib, tahlil qilamiz.

Ta’kidlash joizki, safar bellashuvlarida yaxshi o‘yin namoyish eta olmayapmiz.

O‘z navbatida bugungi uchrashuv hakamlarining ayrim qarorlariga tushunmay qoldim. Futbolchimiz ikkinchi marta ogohlantirilganida, aslida boshqa o‘yinchi o‘yin qoidasini buzgandi. Natijada hisob 1:1 bo‘lib turganida, jamoamiz maydonda 10 kishi bo‘lib qoldi.

Yana bir vaziyatda esa shogirdlarim hujum qilishayotgan paytda raqib hujumchisi tomonidan o‘yin qoidasi buzildi. Ammo hakamlar bunga e’tibor qaratishmadi.

Ushbu mag‘lubiyatdan keyin klub rahbariyati qanday qarorga keladi, noma’lum. Ammo ularning har qanday qarorlarini hurmat qilaman.

- Joriy mavsumda “Sho‘rtan”ning oldiga qanday vazifa qo‘yilgan?

- To‘g‘ri, ayni paytda Pro ligada “Dinamo”, “Lokomotiv” va “Qo‘qon-1912” jamoalari Superliga yo‘llanmasi uchun kurash olib bormoqda. Ammo “Sho‘rtan” ham har bir o‘yinda g‘alaba qozonish uchun maydonga tushadi.

Maqsadimiz, iloji boricha turnir jadvalining yuqori qismidan joy olish.