Pro liganing 17-turidan o‘rin olgan “Navbahor-farm” – “Sho‘rtan” (2:1) uchrashuvidan keyingi matbuot anjumanining ikkinchi qismida farm jamoamiz murabbiyi Rashidjon G‘ofurov ishtirok etib, OAV xodimlarining savollariga javob berdi.
Mezbonlar ustozi odatdagidek, o‘z so‘zini o‘yin haqidagi fikrlari bilan boshladi.
- Uchrashuvning keskin kurashlar ostida o‘tishini oldidan bilgandik. Shu bois, o‘yinni boshqacha uslubda, jangovar ruhda o‘tkazdik. Tarkibda ham rotasiyani amalga oshirdik. Ushbu o‘zgarishlar o‘z samarasini berib, yakunda 2:1 hisobida g‘alaba qozonishga muvaffaq bo‘ldik.
- Bugungi raqib - “Sho‘rtan”ning o‘yini borasida nima deya olasiz?
- G‘uzorliklar tarkibida bo‘ydor futbolchilar ko‘pligi bois, mehmonlarning ikkinchi qavatda, yakkakurashlarda yaxshi o‘ynashlari, shuningdek, ko‘proq standart vaziyatlardan foydalanishga harakat qilishlarini yaxshi bilardik va ushbu bahsga shunga yarasha tayyorgarlik ko‘rgandik.
“Sho‘rtan” kutganimizdek, o‘ynadi. Biz esa ko‘proq jamoaviy o‘yinga e’tibor qaratdik.
Ta’kidlash joizki, biz mazkur bellashuvdan ko‘ra, G‘uzorda erkinroq o‘yin namoyish etgandik va ko‘proq xavfli vaziyatlarni yuzaga keltirgandik. Bugungi bahsda jamoamiz Pro ligada “jon saqlab qolish”ga harakat qilayotgani, ochko bizga suv va havodek zarur bo‘lganligi bois, yigitlarda biroz bosim yuzaga keldi.
Ammo Xudoga shukr, shogirdlarim yakunda bosimni yengib, g‘alaba qozonishga muvaffaq bo‘lishdi.
