Rayan Gravenberx yozgi transferlar bozorida «Liverpul» tomonidan xarid qilingan 4-futbolchi bo‘ldi.
«Bavariya»da jarohatlar tufayli ishlari yurishmagan niderlandiyalik yangi klubida 38-raqam ostida o‘ynaydi. Istiqbolli yarim himoyachi shartnoma ostiga imzo chekkanidan keyin klub rasmiy sayti jurnalistlarining intervyu haqidagi iltimoslarini rad etolmadi.
- Rayan, transferingiz dedlayn kuni amalga oshdi. Taassurotlar qanday?
- Hammasi muammosiz hal etilgani va nihoyat, bu yerda ekanligimdan xursandman, albatta.
- So‘nggi kunlarda rosa asabiylashgandirsiz...
- Yo‘q, unchalik emas. Xotirjamlikni saqlab qolishga harakat qildim. Binobarin, agentim hammasi yaxshi bo‘lishini aytib, tinchlantirib turdi. Qisqasi, shunchaki, hordiq chiqardim va kutdim. To‘g‘ri, kutish uncha yoqimli emas.
- Nega aynan «Liverpul» variantida to‘xtadingiz?
- Gap dunyo futbolidagi eng yirik klublardan biri haqida ketmoqda. Muxlislar, stadion - tashqi tomondan hammasi juda kuchli ko‘rinadi.
- Taklifni qabul qilishdan oldin Virjil va Kodi bilan gaplashdingizmi?
- Albatta. Ular yaxshigina jamoa yig‘ilgani va hammasi eng yuqori darajada ekanligini aytishdi. Qisqasi, yakuniy qaror chiqarish borasida uzoq bosh qotirmadim.
- Yurgen Klopp bilan asosan nimalarni muhokama qildingiz?
- Hammasini. Yurgen meni iliq kutib oldi. Oldiga qallig‘im bilan keldim va barchasi haqida bafurja gaplashdik. Endi Klopp mashg‘ulotlarida ish boshlash onlarini intiq holda kutyapman.
- «Ayaks» safida «Enfild»da o‘ynagansiz, ammo o‘sha bahsga muxlislar qo‘yilmagandi. Stadiondan nima kutyapsiz?
- Albatta, shovqinli va muxlislar bilan to‘la tribunalarni ko‘rishni istayman hamisha. Yana You’ll never walk alone qo‘shig‘ini balandroq ovozda eshitishni ham.
- Bu yerga kelish masalasida ota-onangiz va do‘stlaringiz bilan ham maslahatlashdingizmi?
- Ha, ota-onam bilan ko‘p gaplashdik. Ular aynan «Liverpul» safiga qo‘shilishimni yoqlashdi.
- Ijtimoiy tarmoqlarda sport zalida «Liverpul» libosida tushgan suratingiz muhokama qilinmoqda. O‘sha foto tarixiga to‘xtalsangiz...
- Rostdanmi? Ochig‘i, buni ko‘rmagandim. Surat 2 yilcha oldin olingan, «Liverpul» formasini esa Ki-YAna Xuver bergandi. Chiroyli futbolka.
- Kuchli jihatlaringizni tavsiflab bersangiz.
- Yaxshigina driblingga egaman, texnik salohiyatim ham chakki emas. O‘ylashimcha, zarba berishni bilaman, box-to-box rolini bajaraman.
- Xo‘sh, o‘yin uslubingiz «Liverpul»ga mos kelarmikan?
- Ha, 100 foiz.
- «Bavariya»da yetarli amaliyotiga ega bo‘lmagansiz. O‘tish qaroriga shu ham ta’sir qildimi?
- Rostini aytsam, ha. «Liverpul»da barchasini yangitdan boshlash imkoni bor. Demak, qattiq ishlashga tayyorman.
- Oldingizga qanday maqsadlar qo‘ymoqdasiz?
- Avvalo, sovrinlar yutish, ko‘proq o‘ynashni. Asosiysi, kim ekanligimiz, kim ekanligimni ko‘rsatsam, bas.
M.PO‘LATOV tayyorladi
