Райан Гравенберх ёзги трансферлар бозорида «Ливерпуль» томонидан харид қилинган 4-футболчи бўлди.
«Бавария»да жароҳатлар туфайли ишлари юришмаган нидерландиялик янги клубида 38-рақам остида ўйнайди. Истиқболли ярим ҳимоячи шартнома остига имзо чекканидан кейин клуб расмий сайти журналистларининг интервью ҳақидаги илтимосларини рад этолмади.
- Райан, трансферингиз дедлайн куни амалга ошди. Таассуротлар қандай?
- Ҳаммаси муаммосиз ҳал этилгани ва ниҳоят, бу ерда эканлигимдан хурсандман, албатта.
- Сўнгги кунларда роса асабийлашгандирсиз...
- Йўқ, унчалик эмас. Хотиржамликни сақлаб қолишга ҳаракат қилдим. Бинобарин, агентим ҳаммаси яхши бўлишини айтиб, тинчлантириб турди. Қисқаси, шунчаки, ҳордиқ чиқардим ва кутдим. Тўғри, кутиш унча ёқимли эмас.
- Нега айнан «Ливерпуль» вариантида тўхтадингиз?
- Гап дунё футболидаги энг йирик клублардан бири ҳақида кетмоқда. Мухлислар, стадион - ташқи томондан ҳаммаси жуда кучли кўринади.
- Таклифни қабул қилишдан олдин Виржиль ва Коди билан гаплашдингизми?
- Албатта. Улар яхшигина жамоа йиғилгани ва ҳаммаси энг юқори даражада эканлигини айтишди. Қисқаси, якуний қарор чиқариш борасида узоқ бош қотирмадим.
- Юрген Клопп билан асосан нималарни муҳокама қилдингиз?
- Ҳаммасини. Юрген мени илиқ кутиб олди. Олдига қаллиғим билан келдим ва барчаси ҳақида бафуржа гаплашдик. Энди Клопп машғулотларида иш бошлаш онларини интиқ ҳолда кутяпман.
- «Аякс» сафида «Энфилд»да ўйнагансиз, аммо ўша баҳсга мухлислар қўйилмаганди. Стадиондан нима кутяпсиз?
- Албатта, шовқинли ва мухлислар билан тўла трибуналарни кўришни истайман ҳамиша. Яна You’ll never walk alone қўшиғини баландроқ овозда эшитишни ҳам.
- Бу ерга келиш масаласида ота-онангиз ва дўстларингиз билан ҳам маслаҳатлашдингизми?
- Ҳа, ота-онам билан кўп гаплашдик. Улар айнан «Ливерпуль» сафига қўшилишимни ёқлашди.
- Ижтимоий тармоқларда спорт залида «Ливерпуль» либосида тушган суратингиз муҳокама қилинмоқда. Ўша фото тарихига тўхталсангиз...
- Ростданми? Очиғи, буни кўрмагандим. Сурат 2 йилча олдин олинган, «Ливерпуль» формасини эса Ки-Яна Хувер берганди. Чиройли футболка.
- Кучли жиҳатларингизни тавсифлаб берсангиз.
- Яхшигина дриблингга эгаман, техник салоҳиятим ҳам чакки эмас. Ўйлашимча, зарба беришни биламан, box-to-box ролини бажараман.
- Хўш, ўйин услубингиз «Ливерпул»га мос келармикан?
- Ҳа, 100 фоиз.
- «Бавария»да етарли амалиётига эга бўлмагансиз. Ўтиш қарорига шу ҳам таъсир қилдими?
- Ростини айтсам, ҳа. «Ливерпул»да барчасини янгитдан бошлаш имкони бор. Демак, қаттиқ ишлашга тайёрман.
- Олдингизга қандай мақсадлар қўймоқдасиз?
- Аввало, совринлар ютиш, кўпроқ ўйнашни. Асосийси, ким эканлигимиз, ким эканлигимни кўрсатсам, бас.
М.ПЎЛАТОВ тайёрлади
