Yevropa chempionlar ligasi guruh bosqichi 1-turidan o‘rin olgan “Atletiko”ga qarshi bahsda (1:1) “Lasio” darvozaboni Ivan Provedel so‘nggi daqiqalarda raqib darvozasini ishg‘ol qildi.
Provedel 2009 yildan beri Chempionlar Ligasida gol urgan ilk darvozabon hisoblanadi.
Shu vaqtga qadar turnirda gol urgan so‘nggi posbon Sinan Bolat edi. “Standart” kiperi Sinan 2009 yil 9 dekabr sanasida “AZ”ga qarshi bahsda gol urib, jamoasining 1:1 hisobidagi durang natija qayd etishiga yordam bergandi.
Agar YECHL saralash o‘yinlari ham hisobga olinsa, so‘nggi gol Vinsent Enemaga tegishli edi. “Xapoel” darvozaboni 2010 yil 18 avgustda “Zalsburg” darvozasiga (3:2) penaltidan gol urgandi.
Chempionlar Ligasi tarixida (saralash o‘yinlari ham hisobga kiradi) 5 nafar darvozabon o‘z hisobiga gol yozdirib qo‘ygan. Yuqorida tilga olingan 3 nafar posbondan tashqari Hans-Yorg Butt (2000 yil “Gamburg” safida, 2002 yil “Bayer” safida, 2007 yil “Bavariya” safida) hamda Dimitar Ivankov (2000 yil “Levski” tarkibida) o‘z nomiga gol yozdirib qo‘ygan.
Yana bir qiziq fakt: Provedel o‘yindan gol urgan ilk darvozabon bo‘ldi; Bolat jarima zarbasidan uzatilgan to‘pni boshi bilan darvozaga kiritgan, qolgan uch posbon esa penaltidan raqib darvozasini ishg‘ol qilgan.
