Xitoyning Xanchjou shahrida bo‘lib o‘tayotgan Osiyo O‘yinlarida futbol musobaqasining guruh bosqichiga yakun yasaldi. Temur Kapadze boshchiligidagi O‘zbekiston olimpiya terma jamoasi Gonkongga qarshi ikkinchi o‘yinni o‘tkazib, irodali g‘alabaga erishdi.

Gonkongliklar 4-daqiqada hisobni ochishga muvaffaq bo‘lishdi. Vakillarimiz tanaffusga qadar raqib darvozasiga yo‘l topa olishmadi.

Ikkinchi bo‘lim boshida Gonkong darvozasi tomon penalti belgilandi. Alisher Odilov esa kuchli zarba bilan to‘pni darvozadan yuqoriga tepib yubordi. Nihoyat, o‘zbekistonliklarning urinishlari 65-daqiqada samara berdi. Qanotdan yetkazilgan to‘pni Alibek Davronov bosh bilan raqib darvozasiga joyladi.

Oradan 5 daqiqa o‘tib esa Jaloliddinov raqib jarima maydoni ichida oxirigacha kurashdi va himoyachilarning xatosidan foydalanib, ikkinchi to‘pni kiritdi.

O‘yin so‘ngida Hojimat Erkinov va Gonkongning bir futbolchisi maydondan chetlatildi. SHU bois, Erkinov keyingi bosqichda maydonga tushmaydi.

O‘zbekiston 6 ochko bilan guruh g‘olibiga aylandi. Terma jamoamizga nimchorak finalda Indoneziya raqiblik qiladi. Uchrashuv 28 sentyabr kuni Toshkent vaqti bilan 13:30 da boshlanadi.

Osiyo O‘yinlari. Futbol. "C" guruhi, 2-tur
O‘ZBEKISTON - GONKONG - 2:1 (0:1)
Gollar: Alibek Davronov (65ʼ), Jasurbek Jaloliddinov (70ʼ) – Ley Ngai Xoi (4ʼ)
Noaniq penalti: Alisher Odilov (54)
Chetlatishlar: Hojimat Erkinov (O‘zbekiston), Jahongir Xon (Gong Kong)