Хитойнинг Ханчжоу шаҳрида бўлиб ўтаётган Осиё Ўйинларида футбол мусобақасининг гуруҳ босқичига якун ясалди. Темур Кападзе бошчилигидаги Ўзбекистон олимпия терма жамоаси Гонконгга қарши иккинчи ўйинни ўтказиб, иродали ғалабага эришди.

Гонконгликлар 4-дақиқада ҳисобни очишга муваффақ бўлишди. Вакилларимиз танаффусга қадар рақиб дарвозасига йўл топа олишмади.

Иккинчи бўлим бошида Гонконг дарвозаси томон пенальти белгиланди. Алишер Одилов эса кучли зарба билан тўпни дарвозадан юқорига тепиб юборди. Ниҳоят, ўзбекистонликларнинг уринишлари 65-дақиқада самара берди. Қанотдан етказилган тўпни Алибек Давронов бош билан рақиб дарвозасига жойлади.

Орадан 5 дақиқа ўтиб эса Жалолиддинов рақиб жарима майдони ичида охиригача курашди ва ҳимоячиларнинг хатосидан фойдаланиб, иккинчи тўпни киритди.

Ўйин сўнгида Ҳожимат Эркинов ва Гонконгнинг бир футболчиси майдондан четлатилди. ШУ боис, Эркинов кейинги босқичда майдонга тушмайди.

Ўзбекистон 6 очко билан гуруҳ ғолибига айланди. Терма жамоамизга нимчорак финалда Индонезия рақиблик қилади. Учрашув 28 сентябрь куни Тошкент вақти билан 13:30 да бошланади.

Осиё Ўйинлари. Футбол. "C" гуруҳи, 2-тур
ЎЗБЕКИСТОН - ГОНКОНГ - 2:1 (0:1)
Голлар: Алибек Давронов (65ʼ), Жасурбек Жалолиддинов (70ʼ) – Лей Нгаи Хои (4ʼ)
Ноаниқ пенальти: Алишер Одилов (54)
Четлатишлар: Ҳожимат Эркинов (Ўзбекистон), Жаҳонгир Хон (Гонг Конг)