Osiyo O‘yinlarida bugun erkaklar ikki, ayollar bir vaznda bahslarda ishtirok etishmoqda. Ikki vakilimiz yarim final ketma-ket ikkita o‘yinda g‘alaba qozonib, yarim finalgacha yetib kelishdi.

Ulug‘bek Rashitov (-68 kg) dastlab gonkonglik (2:0), so‘ngra taypeylik raqibni mag‘lub etdi (2:0). Unga yarim finalda koreyalik Jin Xo Jun raqiblik qiladi.

Taekvondo WT bo‘yicha O‘zbekiston terma jamoasi a’zosi Feruza Sodiqova ham g‘alabali yurishini davom ettirmoqda. U ilk bosqichda tailandlik sportchini mag‘lub etgan bo‘lsa, chorak finalda qozog‘istonlik Nuray Xussaynovaga qarshi jangda raundlar bo‘yicha 2:1 hisobida ustun kelib, yarim final yo‘llanmasini qo‘lga kiritdi. Feruza final yo‘llanmasi uchun eronlik Malika Mirhussayniyga qarshi dayanga chiqadi.

Jasurbek Jaysunov (-80 kg.) esa ilk bosqichda kuvaytlik raqibni mag‘lub etgan bo‘lsa, chorak finalda iordaniyalik Solih el-SHarabatiyga alamli tarzda mag‘lub bo‘ldi. Ilk raundda hamyurtimiz 2:0 hisobida g‘alaba qozondi. Ikkinchi bo‘lim tugashiga bir soniya qolganida Jasur 5:3 hisobida oldinda edi. Ammo so‘nggi soniyalarda zarba o‘tkazib yuborib, raundda boy berdi. Uchinchi bo‘limda ham shunday holat kuzatildi. Jaysunov oldinda bordi va soniyalar qolganida zarba o‘tkazib, medallardan quruq qoldi.