Xitoyda bo‘lib o‘tayotgan Osiyo O‘yinlarining boks musobaqasida erkaklar o‘rtasidagi 51 kg. vaznning asosiy yetakchilari — Hasanboy Do‘smatov va Saken Bibosinov nimchorak final bosqichidayoq o‘zaro to‘qnash kelib qolishdi (savol: nega bunday bo‘ldi?).

Shu paytgacha bu ikki sportchi o‘rtasidagi o‘zaro hisob-kitoblar teng edi (1:1). Endi esa hamyurtimiz oldinga o‘tib oldi.

Murabbiylarimiz qiyin raqibga nisbatan to‘g‘ri taktika tanlab, Do‘smatovni juda yaxshi tayyorlashdi. Hamyurtimiz dastlabki ikki raund davomida raqibiga nisbatan ko‘proq aniq zarba yo‘llab, amalda jang taqdirini hal qilib qo‘ydi. Uchinchi bo‘limda Bibosinov tavakkal qilib oldinga tashlandi va so‘nggi raundni o‘z foydasiga hal qildi. Yakuniy baholar — 4:1 (29:28, 29:28, 29:28, 30:27, 28:29).

Hasanboy chorak finalda Al-Nuaymiy (BAA) / Rashid (Pokiston) juftligi g‘olibiga qarshi ringga ko‘tariladi. Bu jang 3 oktyabr sanasiga belgilangan.