"Bavariya" hujumchisi Xarri Keyn jamoasi safarda "Leypsig"ni mag‘lub eta olmagan Germaniya chempionati 6-tur o‘yinidan so‘ng o‘z fikrlarini bildirib o‘tdi. Keyn butun 90 daqiqani maydonda o‘tkazdi va bitta gol urdi.

“Biz yaxshiroq ish qila olishimizni bilamiz. Har daqiqada birgalikda kurashish muhim! Mehmondagi ajoyib qo‘llab-quvvatlash uchun muxlislarga rahmat", - deb post qoldirdi ijtimoiy tarmoqdagi sahifasida.

Joriy mavsumda 30 yoshli hujumchi barcha musobaqalarni hisobga olgan holda sakkizta o‘yinda to‘qqizta gol urdi va to‘rtta golli uzatmani amalga oshirdi.

Olti turdan keyin “Bavariya” 14 ochko bilan Germaniya chempionatida uchinchi o‘rinni egallab turibdi. Aytish joizki, myunxenliklar so‘nggi uchta o‘yinda ikkinchi durangga erishgan.