Osiyo Chempionlar Ligasi guruh bosqichining 2-turida “Navbahor” 3-oktyabr, seshanba kuni “Mumbay Siti”ga qarshi bahs olib bordi.

Uchrashuvning birinchi bo‘limida darvozalar ishg‘ol etilmadi. Qayd etib o‘tish joiz, Hindiston klubi vakili Greg Styuart 43-daqiqada penaltidan tepgan to‘pini darvozabon O‘tkir Yusupov qaytardi. Mezbonlar dastlabki 45 daqiqalikda juda sust harakat qilganini ta’kidlash lozim.

Babayan shogirdlari ikkinchi bo‘limda biroz jonlanishdi. Vaziyatlardan foydalanishda esa o‘yinchilarning individual mahorati muhim rol o‘ynadi. 52-daqiqada Jamshid Iskanderov uzoqdan ajoyib zarba bilan darvozani ishg‘ol etdi. Oradan 6 daqiqa o‘tib, Oston O‘runovning qanotdan reyd uyushtirib, uzatgan to‘pini Jasur Yaxshiboyev darvozaga joylab qo‘ydi. O‘yin so‘ngida esa Temurxo‘ja Abduxoliqovning aniq pasidan keyin Doniyor Abdumannopov raqib posboni bilan yakkama-yakka vaziyatga chiqib ketdi va "parashyut" uslubida darvozani ishg‘ol qildi — 3:0.

Ushbu g‘alabadan so‘ng Samvel Babayan shogirdlari ochkolari sonini 4 taga yetkazib oldi.

Eslatib o‘tamiz, Namangan jamoasi 1-turda Saudiyaning “Al-Hilol” klubi bilan 1:1 hisobida durang o‘ynagandi.

OCHL, «D» guruhi, 2-tur
3-oktyabr, seshanba
“Navbahor” – “Mumbay Siti” 3:0 (0:0)
Gollar: 1:0 — 52 Jamshid Iskanderov, 2:0 — 58 Jasur Yaxshiboyev, 3:0 — 88 Doniyor Abdumannopov.
“Navbahor”: 1. O‘tkir Yusupov, 5. Milosh Milovich, 6. Ibrohim Yo‘ldoshev, 7. Oston O‘runov (19. Doniyor Abdumannopov, 82), 8. Jasurbek Yaxshiboyev (77. Asadbek Sobirjonov, 82), 10. Jamshid Iskanderov, 13. Filip Ivanovich, 14. Jamshid Boltaboyev, 22. Igor Golban, 23. Yovan Jokich, 91. Toma Tabatadze (21.Temurxo‘ja Abduxoliqov,72).
“Mumbay Siti”: 1. Purba Lachenpa, 4. Tiri, 5. Mehtab Singh, 6. Vikram Partap (29. Bipin Singh, 70), 7. Lalliagzuala Chhangte (23. Abdunosir El Xayati, 58), 8. Van Nieff, 18. Rostin Griffis, 24. Greg Styuart, 30. Jorje Pereyra Dias, 31. Akash Mishra, 45. Lalengmavia.
Ogohlantirishlar: Ibrohim Yo‘ldoshev (62), Jorje Pereyra Dias (66).
Noaniq penalti: Greg Styuart (43, darvozabon)