Tashkil etilganiga hali ko‘p bo‘lmagan Yaypanning “Turon” jamoasiga qarshi “Metallurg” Superligada bugungacha 3 ta o‘yin o‘tkazishgan.

Tomonlar 1 martadan g‘alaba qozonishgan. Yana bitta uchrashuvda durang natija qayd etilgan. “Turon” kuchlilar safidagi birinchi g‘alabasini aynan “Metallurg”ga qarshi o‘yinda tantana qilgan. Jamoalarning bu yil Bekobodda kechgan bahsida kuchlar teng keldi. Mezbonlardan Shahzodjon Ne’matjonov, yaypanliklardan Humoyun Murtozoyev muvaffaqiyat qozongandi. Umumiy gollar nisbati – 3:2, “Turon” foydasiga.
 

Jamoalarning barcha uchrashuvlari:

03.07.2023  «Metallurg» - «Turon»  1:1
21.11.2022  «Metallurg» - «Turon»  1:0
02.07.2022  «Turon» - «Metallurg»  2:0

“Turon” haqida
“Turon” futbol klubi 2017 yil tashkil etilgan. Professional ligalardagi debyutini 2019 yili O‘zbekiston Pro ligasining B ligasida amalga oshirdi. Ilk mavsumidayoq B ligada muvaffaqiyat qozonib, Pro liganing A ligasiga yo‘llanma oldi. 2020 yilgi mavsumda jamoa tarkibi bir qator kuchli futbolchilar bilan to‘ldirildi va Pro ligada yetakchiga aylanib oldi. Mavsum yakunida Farg‘onada “Neftchi” jamoasiga qarshi “Istiqlol” stadionidagi derbida g‘alaba qozonib, Pro liga chempioniga aylandi hamda Superliga yo‘llanmasini rasmiylashtirdi.

Elitadagi debyut omadsiz chiqdi. Jamoa oxirgi o‘rinni egallab Pro ligaga tushib ketdi. Ammo bir yilning o‘zidayoq yana kuchlilar safiga qaytishning uddasidan chiqdi.

“Turon” bugungacha Superligada 46 ta uchrashuv o‘tkazgan. Jamoa 6 ta o‘yinda g‘alaba qozongan. 21 ta bahsda durangga imzo chekkan. 19 ta uchrashuvda imkoniyatni boy bergan. Kiritilgan va o‘tkazib yuborilgan to‘plar nisbati – 30:66. Jamoaning eng yirik g‘alabasi – 2:0, eng yirik mag‘lubiyati – 0:5.