Osiyo o‘yinlarida boks bo‘yicha final janglari boshlandi. Erkaklar o‘rtasidagi eng yengil vazn — 51 kg.da Xanchjouga tashrif buyurgan Hasanboy Do‘smatov faoliyati davomida yana bir yirik sovrinni qo‘lga kiritdi.

Hamyurtimiz finalda Tailand vakili Titasan Panmotga qarshi jang olib bordi. Raqib masofada jang qilish foyda bermasligini bilib, ilk bo‘limdanoq pressing uslubida bosim o‘tkaza boshladi. Bu uslub Do‘smatov uchun biroz kutilmagan bo‘lsa-da, u raqibining ochilgan himoyasidan zarbalar berishga muvaffaq bo‘ldi hamda raundni o‘z foydasiga hal qildi.

Hasanboy ikkinchi bo‘limdan boshlab Panmot uslubiga tezda moslashib oldi va keyingi raundlarni muammosiz g‘alaba qozondi. Yakuniy baholar — 5:0 (30:27, 30:27, 30:27, 29:28, 29:28).

Shu tariqa, 2018 yilgi Osiyo O‘yinlarida kumush medalni qo‘lga kiritgan Hasanboy Do‘mastov bu safar yurtimizga oltin medal bilan qaytadigan bo‘ldi.

Ma’lumot o‘rnida. Hasanboy Do‘smatov bir martadan olimpiada va jahon chempionligini, ikki marta Osiyo chempionligini qo‘lga kiritgan.