Осиё ўйинларида бокс бўйича финал жанглари бошланди. Эркаклар ўртасидаги энг енгил вазн — 51 кг.да Ханчжоуга ташриф буюрган Ҳасанбой Дўсматов фаолияти давомида яна бир йирик совринни қўлга киритди.

Ҳамюртимиз финалда Таиланд вакили Титасан Панмотга қарши жанг олиб борди. Рақиб масофада жанг қилиш фойда бермаслигини билиб, илк бўлимданоқ прессинг услубида босим ўтказа бошлади. Бу услуб Дўсматов учун бироз кутилмаган бўлса-да, у рақибининг очилган ҳимоясидан зарбалар беришга муваффақ бўлди ҳамда раундни ўз фойдасига ҳал қилди.

Ҳасанбой иккинчи бўлимдан бошлаб Панмот услубига тезда мослашиб олди ва кейинги раундларни муаммосиз ғалаба қозонди. Якуний баҳолар — 5:0 (30:27, 30:27, 30:27, 29:28, 29:28).

Шу тариқа, 2018 йилги Осиё Ўйинларида кумуш медални қўлга киритган Ҳасанбой Дўмастов бу сафар юртимизга олтин медаль билан қайтадиган бўлди.

Маълумот ўрнида. Ҳасанбой Дўсматов бир мартадан олимпиада ва жаҳон чемпионлигини, икки марта Осиё чемпионлигини қўлга киритган.