"Manchester Yunayted" yarim himoyachisi Brunu Fernandesh "Brentford" ustidan qozonilgan dramatik g‘alabadan so‘ng o‘z fikrlari bilan o‘rtoqlashdi.

Qo‘shib berilgan vaqtning uchinchi daqiqasigacha hisobda ortda qolgan Erik ten Xag shogirdlari o‘zida kuch topib, uch ochkoni tortib olishdi – 2:1. “Qizil iblislar”ning ikkala goliga ham zaxiradan maydonga tushgan yarim himoyachi Skott Maktominey mualliflik qildi.

“Biz yengillik va quvonchni his qilamiz. Biz bu g‘alabaga haqli ekanligimizni tushunamiz, chunki o‘yinni nazorat qildik va birinchi bo‘limda gol urishimiz mumkin edi. Raqib birinchi bo‘lib gol urganida har doim qiyin bo‘ladi, ammo bugun bizni Skottning ikkita goli qutqarib qoldi. Bu uch ochko biz uchun zarur edi.

Bugun jamoa birdamlik va xarakter namoyish etdi. O‘ylaymanki, bizning sa’y-harakatlarimiz ijobiy bahoga loyiq", - dedi Fernandesh MUTV telekanaliga bergan intervyusida.