"Манчестер Юнайтед" ярим ҳимоячиси Бруну Фернандеш "Брентфорд" устидан қозонилган драматик ғалабадан сўнг ўз фикрлари билан ўртоқлашди.

Қўшиб берилган вақтнинг учинчи дақиқасигача ҳисобда ортда қолган Эрик тен Хаг шогирдлари ўзида куч топиб, уч очкони тортиб олишди – 2:1. “Қизил иблислар”нинг иккала голига ҳам захирадан майдонга тушган ярим ҳимоячи Скотт Мактоминей муаллифлик қилди.

“Биз енгиллик ва қувончни ҳис қиламиз. Биз бу ғалабага ҳақли эканлигимизни тушунамиз, чунки ўйинни назорат қилдик ва биринчи бўлимда гол уришимиз мумкин эди. Рақиб биринчи бўлиб гол урганида ҳар доим қийин бўлади, аммо бугун бизни Скоттнинг иккита голи қутқариб қолди. Бу уч очко биз учун зарур эди.

Бугун жамоа бирдамлик ва характер намойиш этди. Ўйлайманки, бизнинг саъй-ҳаракатларимиз ижобий баҳога лойиқ", - деди Фернандеш MUTV телеканалига берган интервьюсида.