Rossiya tashqi ishlar vazirligi vakili Mariya Zaxarova UYEFAning mamlakat yoshlar terma jamoalarini rasmiy musobaqalarga kiritishni bekor qilish haqidagi qarorga javob qaytardi.
Zaxarovaning so‘zlariga ko‘ra, UYEFA allaqachon siyosiy tashkilotga aylanib bo‘lgan.
«UYEFA neytral qaror qabul qilishi kerak edi. Agar u xalqaro siyosiy tashkilot bo‘lsa, unda har bir mamlakatning siyosiy talablari, siyosiy motivlari, siyosiy yondashuvlarini hisobga olishi kerak. Biroq bu sport tashkilotidir», — deya Zaxarovaning so‘zlarini keltiradi TASS.
Zaxarovaning qo‘shimcha qilishicha, agar UYEFA sport tashkiloti bo‘lsa, u holda u o‘z nizomi doirasida «sport siyosatdan tashqari» tamoyili asosida harakat qilishi kerak.
Agar UYEFA o‘zini siyosiy tashkilot deb hisoblasa, u o‘z maqomi va ramzlarini o‘zgartirishi, shuningdek, bu haqda a’zolarini xabardor qilishi kerak, deb hisoblaydi Zaxarova.
