Londonning “Tottenxem” klubi bosh murabbiyi Anj Postekoglou Angliya Premyer-ligasining sentyabr oyidagi eng yaxshi murabbiyiga aylandi. Bu haqda APL matbuot xizmati xabar berdi.
Sentyabr oyida "shporlar" milliy chempionatda uchta g‘alaba bilan mag‘lubiyatsiz o‘tishdi. Yana bir uchrashuv durang bilan yakunlandi. Postekoglou ushbu sovrin uchun kurashda Mikel Arteta («Arsenal»), Unai Emeri («Aston Villa»), Eddi Xau («Nyukasl») va Yurgen Klopp («Liverpul»)ni ortda qoldirdi.
Eslatib o‘tamiz, 58 yoshli Postekoglou ligadagi dastlabki ikki oyida ikki marta Premyer-ligada oyning eng yaxshi murabbiyi deb topilgan tarixdagi birinchi murabbiyga aylandi.
Sakkiz turdan keyin “Tottenxem” 20 ochko bilan Angliya chempionati turnir jadvalida peshqadamlik qilmoqda.