Antonio Konte murabbiylikning o‘ziga xos jihatlari haqida o‘z fikrlari bilan o‘rtoqlashdi.

Mart oyida "Tottenxem"ni tark etgan 54 yoshli italiyalik haligacha ishga qaytgani yo‘q. Mish-mishlarga ko‘ra, mutaxassis "Napoli"ni boshqarishi mumkin edi, biroq bu taklifni rad etgan.

“Men "Bari" bilan 4-2-4 sxemasida o‘ynab, muvaffaqiyatga erishdim, keyin “Yuventus”da ham xuddi shunday yo‘l tutdim, biroq Pirlo va Kyellinining xususiyatlarini qadrlab, 4-3-3ga o‘tdim va keyinroq uchta markaziy himoyachi bilan o‘ynash tizimini tikladim.

“Chelsi”da men 4-2-4 usulidan foydalanmoqchi edim, ammo “Arsenal” bilan o‘yinda tanaffusda, 0:3 hisobida yutqazayotganimizda, tizimni o‘zgartirishga qaror qildim – yakunda biz Premyer-ligada g‘alaba qozondik. Barcha sxemalar ishlashi mumkin, ammo murabbiy xuddi o‘qituvchi kabi shogirdlari qalbi va ongiga kirib borishi kerak", - deya mutaxassisning so‘zlarini keltiradi Janluka di Marsio.