O‘zbekiston milliy jamoasi bosh murabbiyi Srechko Katanes Xitoyga qarshi bo‘lib o‘tgan o‘rtoqlik o‘yini (2:1) borasida o‘z fikrlari bilan o‘rtoqlashdi.

— Birinchi navbatda aytishim mumkinki, o‘yin shiddatli kechdi. Biz g‘alabaga munosib edik, deb hisoblayman. Chunki 90 daqiqa davomida biz hujum qildik. Xitoy esa yaxshi himoyalandi.

Birinchi bo‘limdan u qadar ko‘nglim to‘lmadi. Chunki shogirdlarim to‘p bilan sekin muomalada bo‘lishdi. Bundan tashqari, ba’zida xatolarga yo‘l qo‘ydik. Shu bilan birgalikda to‘pni oldingi chiziqqa yetkazishda muammolar yuzaga keldi.

Ikkinchi taymda esa vaziyatni to‘g‘irladik, o‘yinga temp qo‘shdik. Shuning uchun kerakli natijaga erishdik, deb o‘ylayman. G‘alaba bilan futbolchilarni tabriklayman.

— O‘yindan oldinga matbuot anjumanida maydon holati haqida gapirib o‘tgandingiz. Bugungi o‘yinga maydon holatidan kelib chiqib taktika tanladingizmi?
— Bugungi taktikani maydonga aloqasi yo‘q edi. Bugun ham aytishim mumkinki, maydon futbolchilarga jarohat yetkazib qo‘yishi nuqtai nazaridan xavfli edi. Shuning uchun bugun o‘yinchilarim jarohat olmasligiga umid qildim.