Xitoy milliy jamoasi bosh murabbiyi Aleksandr Yankovich O‘zbekistonga qarshi bo‘lib o‘tgan o‘rtoqlik o‘yini (1:2) borasida o‘z fikrlari bilan o‘rtoqlashdi.

— Kuchli raqiblarga qarshi o‘yinlarda himoyada xatolar ro‘y berib turadi. Bu biz uchun foydali tajriba. Men futbolchilarga jarima maydonimiz ichida qoida buzmagan holda kurashish kerakligini aytgandim. Bugungi bahsda yo‘l qo‘yilgan xatolar uchun mas’uliyatni o‘z zimmamga olaman.

Rivojlanish maqsadida to‘g‘ri yo‘lga tushib olish uchun kuchli jamoalar bilan ko‘proq o‘ynashimiz kerak. Bu jarayonda natija bugungidek salbiy bo‘lishi mumkin. Mag‘lubiyatda esa futbolchilarni ayblamayman. Chunki barcha mas’uliyat murabbiy zimmasida bo‘ladi.

— Milliy chempionatimiz saviyasi yuqori bo‘lmagani uchun o‘yinchilar xalqaro o‘yinlar tempiga dosh bera olmayaptimi?
— Chempionat saviyasiga baho berishim qiyin. Ammo terma jamoaga shunday uchrashuvlar kerak. Biz raqiblarning o‘yin tempini his etgan holda ularga moslashishimiz kerak. Bu futbolchilarga katta foyda beradi. Futbol ham hayotga o‘xshaydi. Ba’zida og‘riqni his etib turish kerak. Yana takrorlayman, agar biz bugungi bahs uchun kuchli raqibni tanlamaganimizda, rasmiy o‘yinlar boshlanguncha bunday tajribaga ega bo‘lmagan bo‘lardik. Maqsadimiz — jahon chempionatiga chiqish. Buning uchun eng yaxshi jamoalar bilan raqobatlashib, oldindan og‘riqni his etishimiz zarur. Umid qilaman, bir oydan keyin biz bunday og‘riqqa duch kelmaymiz. Bundan tashqari, biz raqiblarni xato qilishga majbur etishimiz kerak.