Хитой миллий жамоаси бош мураббийи Александр Янкович Ўзбекистонга қарши бўлиб ўтган ўртоқлик ўйини (1:2) борасида ўз фикрлари билан ўртоқлашди.

— Кучли рақибларга қарши ўйинларда ҳимояда хатолар рўй бериб туради. Бу биз учун фойдали тажриба. Мен футболчиларга жарима майдонимиз ичида қоида бузмаган ҳолда курашиш кераклигини айтгандим. Бугунги баҳсда йўл қўйилган хатолар учун масъулиятни ўз зиммамга оламан.

Ривожланиш мақсадида тўғри йўлга тушиб олиш учун кучли жамоалар билан кўпроқ ўйнашимиз керак. Бу жараёнда натижа бугунгидек салбий бўлиши мумкин. Мағлубиятда эса футболчиларни айбламайман. Чунки барча масъулият мураббий зиммасида бўлади.

— Миллий чемпионатимиз савияси юқори бўлмагани учун ўйинчилар халқаро ўйинлар темпига дош бера олмаяптими?
— Чемпионат савиясига баҳо беришим қийин. Аммо терма жамоага шундай учрашувлар керак. Биз рақибларнинг ўйин темпини ҳис этган ҳолда уларга мослашишимиз керак. Бу футболчиларга катта фойда беради. Футбол ҳам ҳаётга ўхшайди. Баъзида оғриқни ҳис этиб туриш керак. Яна такрорлайман, агар биз бугунги баҳс учун кучли рақибни танламаганимизда, расмий ўйинлар бошлангунча бундай тажрибага эга бўлмаган бўлардик. Мақсадимиз — жаҳон чемпионатига чиқиш. Бунинг учун энг яхши жамоалар билан рақобатлашиб, олдиндан оғриқни ҳис этишимиз зарур. Умид қиламан, бир ойдан кейин биз бундай оғриққа дуч келмаймиз. Бундан ташқари, биз рақибларни хато қилишга мажбур этишимиз керак.