Xabaringiz bor, "Navbahor" Osiyo Chempionlar ligasi (OCHL) “D” guruhi, 3-turidan o‘rin olgan bahsni o‘z maydonida Eronning “Nassaji Mazandaran” klubiga qarshi o‘tkazadi.
Namanganliklarning bo‘lajak raqibi to‘g‘risidagi ma’lumotlarni e’tiboringizga havola etamiz.
“Nassaji Mazandaran” Mazandaran provinsiyasidagi Kaemshahr shahri sharafini himoya qiladi va jamoaga 1959 yili Nassaji Mazandaran Company to‘qimachilik kompaniyasi tomonidan asos solingan. Nassaji so‘zi fors tilidan tarjima qilinganida, “to‘qimachi” degan ma’noni bildiradi. Jamoaning to‘liq nomi tarjima qilinsa, “Mazandaran to‘qimachisi”, degan so‘z kelib chiqadi va bu jamoaning laqabiga ham aylangan.
Yuqoridagi so‘zdan tashqari, jamoani yana “Mazandaran yo‘lbarslari”, mazandaranliklar deb ham atashadi.
Jamoa 1988 yilgacha Eronning hududiy, ko‘proq havaskorlar ligasida qatnashgan. 1989/1990 yillar mavsumida Eronning “Kods” ligasida 3-o‘rinni egallab, Eron 2-divizioniga yo‘llanmani qo‘lga kiritadi. Ikkinchi diviziondagi ilk mavsumdayoq 3-o‘rinni egallagan mazandaranliklar keyingi mavsumdan boshlab, o‘sha paytda Eron oliy ligasi sanaluvchi Azadegan ligasida qatnashish huquqini qo‘lga kiritishadi.
“Nassaji Mazandaran” 2006/2007 yillar mavsumiga qadar, goh Azadegan, goh 2-divizion ligalarida ishtirok etadi hamda 2006/2007 yillar mavsumidan to 2017/2018 yillar mavsumigacha Azadegan ligasida muntazam tarzda qatnashib, 2017/2018 yillar mavsumi yakuniga ko‘ra, 2-o‘rinni egallab, o‘z tarixida ilk marta Eron oliy futbol ligasi sanaluvchi Fors ko‘rfazi Pro-ligasida qatnashish huquqini qo‘lga kiritadi va o‘shandan buyon ushbu ligada ishtirok etmoqda.
"Nassaji" o‘tgan mavsumda Fors ko‘rfazi Pro-ligasida 16 ta jamoa orasida 13-o‘rinni egalladi.
OCHL yo‘llanmasini esa 2021/2022 yillar mavsumining Eron kubogi sohibi sifatida qo‘lga kiritgan.
Ayni paytda “Nassaji Mazandaran” tarkibida 1 nafar legioner, ispaniyalik 30 yoshli yarim himoyachi Nono o‘ynamoqda.
Jamoani bosh murabbiy sifatida Said Mehdi Rahmati boshqarmoqda.
“Nassaji Mazandaran” o‘z uy uchrashuvlarini 15 000 (o‘n besh ming) nafar muxlisga mo‘ljallangan “Vatani” stadionida o‘tkazadi.
Eslatib o‘tamiz, “Navbahor” – “Nassaji Mazandaran” uchrashuvi 23 oktyabr kuni Namangandagi “Markaziy” stadionida soat 21:00 da start oladi.
