Angliya terma jamoasi jahon chempioni va 1966 yilgi “Oltin to‘p” sohibi Bobbi Charlton 86 yoshida vafot etdi, deb xabar berdi “Manchester Yunayted” sayti.
"Manchester Yunayted" klubimiz tarixidagi eng buyuk va sevimli futbolchilardan biri ser Bobbi Charltonning vafoti munosabati bilan qayg‘uradi. Ser Bobbi nafaqat Manchester yoki Buyuk Britaniyada, balki futbol o‘ynaladigan butun dunyoda millionlab odamlar uchun qahramon bo‘lgan. Klub uning rafiqasi Ledi Normaga, qizlari va nabiralariga hamda uni sevgan barchaga samimiy hamdardlik bildiradi”, — deyiladi klub xabarida.
Charlton - "Manchester Yunayted" akademiyasi tarbiyalanuvchisi. Klub bilan 17 yil davomida u 758 o‘yin o‘tkazib va 249 gol urgan.
Charlton Angliya terma jamoasi safida 106 o‘yin o‘tkazib, 49 ta gol urgan va 1966 yilgi jahon chempionatida g‘olib chiqqan. Nafaqaga chiqqanidan so‘ng u "Manchester Yunayted"da 39 yil davomida klub direktori sifatida ishladi.