BAAning Abu-Dabi shahrida 21 oktyabr, shanba kuni  UFC 294 musobaqasi bo‘lib o‘tdi.

Kechaning asosiy jangi Islom Maxachev va Aleksandr Volkanovski o‘rtasida kechdi. Unda Maxachev 1-raunddayoq Volkanovskini kuchli haykik evaziga nokautga uchratdi va kamarini himoya qildi. Shu tariqa Islom Aleksga qarshi ikkinchi jangida ham g‘alaba qozondi.

Eslatib o‘tamiz, Aleksandr Volkanovski va Islom Maxachev ilk bor UFC 284 da to‘qnash kelgan va unda ochkolar evaziga dog‘istonlik jangchining qo‘li baland kelgan.

UFC 294 kechasining ikkinchi asosiy jangi Hamzat Chimayev (13-0) va Kamaru Usmon (20-4) o‘rtasida kechdi. Birinchi raundda Chimayev ustunlik ko‘rsatdi. Kamaru esa munosib himoyalandi.

Ikkinchi raundda esa jangchilar “stoyka”da harakatlandi va unda Usmon faollik ko‘rsatdi. Uchinchi raundda esa Chimayev ham Kamaru ham ochiq jangga kirishdi. Raund o‘rtasida esa Chimayev raqibini parterga oldi. Kamaru esa bundan chiqib keta oldi.

Uch raund natijalariga ko‘ra, Hamzat Chimayev hakamlar qaroriga ko‘ra (29-27, 29-27, 28-28) g‘alaba qozondi.

UFC 294 turnirining qolgan natijalari bilan tanishing:

Asosiy kard natijalari:

Hamzat Chimayev (13-0) Kamaru Usmonni hakamlar qaroriga ko‘ra mag‘lub etdi

Magomed Ankalayev (18-1-1) va Jonni Uoker (21-7) o‘rtasidagi jang Ankalayevning taqiqlangan zarba berishi tufayli o‘tkazilmagan deb topildi

Said Nurmagomedov (18-3) sabmishen orqali tojikistonlik Muin G‘ofurovni (18-6) taslim etdi.

Ikrom Aliskerov (15-1) 1-raundda braziliyalik Varley Alvesni (15-7) nokautga uchratdi.

Prelim kard janglari natijalari:

Muhammad Mokayev (11-0) uchinchi raundda Tim Elliot (20-13-1) ustidan g‘alaba qozondi.

Trevor Pik (9-1) ochkolar evaziga Muhammad Yahyoni (12-4) yutdi;

Javid Bashorat va Viktor Genri o‘rtasidagi jang taqiqlangan zarba sabab o‘tkazilmagan deb topildi.

Sedrik Dyuma (9-1) ochkolar evaziga Abu Azaytarni (14-4-1) yutdi;

Mayk Briden (11-6) 3-raundda Anshu Yublini (7-1) nokaut qildi;

Viktoriya Dudakova (8-0) 3 raundlik jangda ochkolar evaziga Jin Yu Freyni (11-10) mag‘lub etdi.

Muhammad Naimov (10-2) 3-raundlik jangda Nataniel Vudni (20-7) ochkolar evaziga yutdi.

Shara Magomedov (12-0) hakamlar qaroriga ko‘ra Bruno Silvani (23-10) mag‘lub etdi.