Osiyo Chempionlar ligasida "Ahal" ustidan qozonilgan g‘alabadan so‘ng "Paxtakor" bosh murabbiyi Maksim Shaskix va vinger Azizbek Turg‘unboyev o‘z fikrlarini bildirishdi.

Maksim Shaskix: - O‘yinni to‘liq nazorat qildik. Yirikroq hisobda g‘alaba qozonishimiz ham mumkin edi. Birinchi uch ochkoni qo‘lga kiritdik va keyingi uchrashuvlarga tayyorgarlik ko‘rishni boshlaymiz.

"Ahal" jamoasini kuchsiz demagan bo‘lardim. Ular 1-turda "Al Fayha"ni mag‘lub etishdi va "Al Ayn"ga qarshi kechgan uchrashuvda ham ancha sifatli o‘yin namoyish etishdi. Ushbu jamoani ko‘pchilik mensimayapti va bu noto‘g‘ri. Agar bugun g‘alaba qozonmaganimizda guruhdan chiqish imkoniyatlarimiz nolga teng bo‘lar edi.

Ular o‘yda o‘ynaganida raqib jamoa "Ahal"ning kuchini past baholaganligi sabab mag‘lub bo‘ldi va sun’iy qoplamali maydon ham o‘z ta’sirini o‘tkazgan. Bizga ham sun’iy maydon katta muammo tug‘dirishi aniq. Ashhobodga borgandan keyin u yerdagi sharoitlarga moslashishga harakat qilamiz. "Al Ayn"ga qarshi kechgan uchrashuvdagi "Ahal"ni bugun maydonda ko‘rdim va raqib uslubi deyarli o‘zgarmagan.

Azizbek Turg‘unboyev: - Bugun muhim uch ochkoni qo‘lga kiritdik va chiroyli o‘yin o‘tkazdik. Hali guruhdan chiqish imkoniyatlarimiz bor. Qolgan uch uchrashuvda g‘alaba qozonsak, keyingi bosqichga yo‘l olamiz.

Yoshligimda qanot himoyachisi sifatida ham o‘ynaganman. Professional futbolchi tez moslashib ketish qobiliyatiga ega bo‘lish kerak. Murabbiyning vazifasini qo‘ldan kelgancha bajarishga harakat qilyapman.