O‘zbekiston terma jamoasida Argentina bilan o‘rtoqlik uchrashuvi o‘tkazish imkoniyati bo‘lganmi qabilidagi savollar berilmoqda.

Bizdagi ma’lumotlarga ko‘ra, Qatarda Jahon chempionligi qo‘lga kiritilgach, Argentina terma jamoasi shu yilning mart oyida haqiqatdan ham O‘zbekiston terma jamoasini Buenos-Ayresda qabul qilish bo‘yicha qiziqish bildirgan. Hattoki, O‘zbekiston terma jamoasining Argentinadagi mahalliy xarajatlarini qoplashga ham rozilik bildirgan.

Ko‘pchilik uchun bu taklif mantiqqa ziddek tuyulishi mumkin, ammo Jahon kubogi muxlislar oldida namoyish etiladigan ilk o‘yinda Argentinaga o‘z darajasidan pastroq sparring raqib zarur edi. O‘zbekiston esa Argentinaga o‘rtoqlik o‘yinlari bo‘yicha tez-tez taklif bildirib kelganini inobatga olsak, argentinaliklar biz haqimizda eslab qolganining hayron qolarli joyi yo‘q.

Lekin Argentina o‘rtoqlik uchrashuvi bo‘yicha taklifni juda kech, ya’ni O‘zbekiston terma jamoasi Venesuela va Boliviya bilan kelishuvga erishganidan so‘ng bergan. Shu sababdan, O‘zbekiston kelishuv imzolagan raqiblariga hurmatni saqlagan holda, Argentinaga rad javobini berishga majbur bo‘lgan.

Oxir-oqibat, Argentina terma jamoasi Jahon chempionatidan keyin, mart FIFA kunlaridagi o‘rtoqlik o‘yinlarida Panama va Kyurasao terma jamoalarini o‘zida qabul qilganini yaxshi eslasangiz kerak.