"Manchester Yunayted"ning bundan oldingi turlarda qayd etgan uchta ketma-ket g‘alabasi bugun yakuniga yetishi mumkin. Negaki, APLning 10 turida bizni super o‘yin kutib turibdi: "MYU" o‘z uyida hamshahari "Manchester Siti"ni mehmon qiladi. Ha, so‘nggi haftada "Sheffild", "Brentford" va "Kopengagen" mahv etildi. Ammo klub muxlislari uchun bu qiyin g‘alabalar "shaharliklar"ni mag‘lub etishda yetarlicha ishonch bermasligi aniq. Qarshi tomondagi Gvardiola jamoasi ligada "Vulvz" va "Arsenal"dan yutqazganiga qaramasdan, xalqaro tanaffuslardan keyin yana g‘alabali yo‘lga qaytib oldi. Ular "Brayton" va Yang Boyz"ni taslim etishdi. Bugun mana shu ikki raqib, Angliya tarixidagi yagona trebl sohiblarining bo‘lajak jangiga qisqacha to‘xtalib o‘tamiz.

O‘yin qayerda va qachon bo‘lib o‘tadi?

Joy: Manchester, Angliya
Stadion: "Old Trafford"
Sana: 29 oktyabr, yakshanba
Start: 16:30 (mahalliy), 20:30 (Toshkent).
Bosh hakam: Pol Tirni
VAR: Maykl Oliver

"MYU" va "Manchester Siti"ning so‘nggi beshta to‘qnashuvi:
"MYU" – 1 ta g‘alaba
"Man Siti" – 4 ta g‘alaba
Durang – 0 ta.
So‘nggi uchrashuv: Angliya kubogi finali – 3 iyun, 2023 yil:
"Man Siti" 2-1 "MYU".

Jamoalar sport formasi:
"MYU" – MMG‘G‘G‘ (M – MAG‘LUB)
"Man Siti" – MG‘MG‘G‘G‘ (G‘ – G‘OLIB)

"MYU" haqida

Erik ten Xag ushbu uchrashuvga bir nechta jarohatlanganlar, shuningdek, turli sabablar bilan maydonga tusha olmaydigan futbolchilar bilan yetib kelmoqda. Xususan, Kazemiro diskvalifikasiyadan qaytdi. Ammo u jarohati sababli derbida qatnasha olmasligi mumkin. Lyuk Shou, Tirell Malasiya, Uan-Bissaka va Jeydon Sancholar qaydnomaga kiritilmaydi. Ammo yarim himoyachi Kobbi Meynu zaxiradan joy olishi mumkin.

"MYU"ning taxminiy tarkibi
Darvozabon: Andre Onana;
Himoyachilar: Dalot, Varan, Maguayr, Regilon;
Yarim himoyachilar: Kazemiro, Amrabat;
Hujumkor chiziq: Fernandesh, Eriksen, Reshford;
Markaziy hujumchi: Xyoylunn (4-2-3-1).

"Manchester Siti" haqida

Jarohatlanganlar borasida "shaharliklar" uchun vaziyat yaxshilanmoqda. Asosiy yulduzlardan faqatina Kevin De Bryuyne va Zak Steffenlar lazariyatda xolos. So‘nggi APL turida qizil kartochka olgani uchun Manuel Akanji derbini o‘tkazib yuboradi. Gvardiola ixtiyorida hujum va himoyada yetarlicha tanlov bo‘ladi.

"Man Siti"ning taxminiy tarkibi:
Darvozada: Ederson;
Himoyada: Uolker, Dias, Gvardiol;
Yarim himoyada: Stounz, Rodri;
Hujumkor chiziq: Foden, Alvares, Silva, Doku;
Markaziy hujumchi: Erling Xoland (3-2-4-1).

Eslatib o‘tamiz, Manchester derbisini bugun, Toshkent vaqti bilan 20:30 dan boshlab kuzatib borishingiz mumkin bo‘ladi.

ISMATOV J.