France Football tomonidan har yili taqdim etib boriladigan "Oltin to‘p" sovrini eng yaxshilargagina nasib etadi. 2023 yilgi versiya uchun eng asosiy da’vogar sifatida Xoland va Messi qaralmoqda. 30 oktyabr, ya’ni bugun "Oltin to‘p" o‘z egasini topadi. Quyida hozirgacha ushbu sovringa ega chiqqanlarning eng boylarini bilib olasiz.
Krishtianu Ronaldu – 363 million funt
Dunyodagi eng mashhur sportchi bo‘lish bilan birgalikda, Ronaldu eng ko‘p maosh oladigan futbolchi hamdir. Portugaliyalik yulduz Instagram'da 876 million kuzatuvchiga ega. Uning bir yillik daromadi 363 million funtni tashkil etishi aytilgan. Ronaldu "An-Nasr"da yiliga 62 million funt maosh oladi. Turli xil tijoriy hamkorliklar bilan birga Ronalduning maoshi bir yilda 173 million funtgacha boradi. 38 yoshli futbolchi Nike bilan bir umrlik shartnoma imzolagan va bu uchun Ronaldu 1 milliard funt oladi. Qolaversa, qahramonimizning o‘z biznes imperiyasi bor. Ular ichida mehmonxonalar tarmog‘i, ichki kiyim ishlab chiqarish, fitness uskunlari va shampun sanoati eng ko‘zga ko‘ringanlaridir.
Lionel Messi – 105 million funt
Messi barcha davrlardagi eng yaxshi futbolchidir. Bugun u o‘z faoliyatidagi sakkizinchi "Oltin to‘p"ni qabul qilib olishi mumkin. Argentinalik "Inter Mayami"ga ko‘chib o‘tdi. Hozir uning yillik maoshi 35-47 million funt atrofida. Uning yillik daromadi 105 millionni tashkil etadi. 36 yoshli futbolchi ham ko‘plab tijoriy loyihalarda ishtirok etib, o‘z daromadlarini ko‘paytiradi. Adidas va Messi 2017 yildan beri hamkorlik qiladi. Shu sababli u yiliga 20.4 million funt oladi. Shuningdek, Messi Pepsi'ning global elchisidir.
Kaka – 75 million funt
Ronaldu va Messi erasi avvalida bu ikki dahoni Kaka mag‘lub etib, "Oltin to‘p"ga ega chiqadi. 41 yoshli afsona 2007 yilda bu sovringa loyiq deb topilgandi. Kaka 2017 yilda futboldan ketadi. Shunga qaramay, u har yili 74 million funt ishlab topmoqda. Braziliyalik Twitter'da ilk bor 10 million obunachilari bo‘lgan insonga aylangandi. Tijoriy hamkorliklar borasida Kakaning ham omadi chopgan. U global brendlar bo‘lmish PlayStation va OPPO bilan hamkorlik qiladi.
Karim Benzema – 62.5 million funt
Sobiq "Real" hujumchisi 2022 yilgi sovrin egasi sanaladi. Benzema har yili 62 million atrofida daromad ko‘radi. Ayni damda "Al-Ittihod" fransuz hujumchisi xizmatlari evaziga har hafta unga 3.3 million funt maosh beradi. Benzema "Oltin to‘p" topshirish marosimiga qo‘lida 500 ming dollarlik Richard Mille bilan kelgandi. 35 yoshli hujumchi ham tijoriy loyihalarda ancha faol qatnashadi.
Maykl Ouen – 54.4 million funt
Maykl Ouen "Oltin to‘p"ning 2001 yilgi versiyasiga egalik qiladi. 43 yoshli sobiq futbolchi hozirda yiliga 54.4 million funt daromadga ega. Ouen faoliyati davomida "Liverpul", "Real", "Nyukasl", "MYU" va "Stok Siti"da harakat qilgan. U 2013 yilda futbol bilan xayrlashgandi. Shundan beri sobiq hujumchi TNT Sport (BT Sport) kanalida muxbir bo‘lib ishlaydi.
Shuningdek bu borada keyingi o‘rinlarni Zayniddin Zidan, Luish Figu va Fabio Kannavarolar egallaydi.
ISMATOV J.
