"Arsenal" yarim himoyachisi Martin Edegorda son qismidan kichik jarohat olgan, ammo norvegiyalik futbolchi boshqa sababga ko‘ra "Nyukasl" va "Sevilya"ga qarshi noyabrdagi o‘yinlarni o‘tkazib yuborgani ma’lum bo‘ldi. Daily Mail xabariga ko‘ra, "kanonirlar" sardori bu o‘yinlarda miya chayqalishi tufayli maydonga tushmagan - mashg‘ulot vaqtida Edegorning yuziga to‘p kuchli zarb bilan tekkan.
Qayd etilishicha, miya chayqalishi bayonnomasida futbolchi olti kunni o‘tkazib yuborishi kerak, agar alomatlar yo‘qolsa, shundan keyingina u yana safga qaytishi mumkin. Natijada, Edegor o‘tgan hafta oxirida "Byornli"ga qarshi o‘yinni ham o‘tkazib yubordi.
Martin Norvegiya terma jamoasi yig‘iniga bormayapti, biroq bunga son qismidagi jarohat sabab bo‘lgan. Yarim himoyachi terma jamoadagi tanaffusdan keyin tayyor bo‘lishi kutilmoqda.
