Fransiya terma jamoasi bosh murabbiyi Didye Desham Vilyam Salibaning terma jamoadagi o‘rni haqida o‘z fikrlari bilan o‘rtoqlashdi.

22 yoshli himoyachi o‘tgan mavsumdan buyon o‘zini Londonning "Arsenal" jamoasining asosiy o‘yinchilaridan biri sifatida ko‘rsatib kelmoqda, ammo baribir terma jamoaning asosiy tarkibidan joy ololmayapti.

"U o‘z klubida yaxshi o‘yin ko‘rsatadi, lekin terma jamoada har doim ham qulay holatda emas. “Arsenal”da u psixologik jihatdan ancha qulay – u yerda u har bir uchrashuvda maydonga tushishini biladi. Uning terma jamoadagi o‘rniga boshqa ko‘plab futbolchilar da’vogarlik qilmoqda, bu esa unga qo‘shimcha bosim o‘tkazadi. Ammo Vilyamda keyingi qadamni tashlash uchun hamma narsa bor", - deya Desham so‘zlarini keltiradi RMC Sport.