"Milan" bosh murabbiyi Stefano Pioli yaqin orada iste’foga chiqarilishi dargumon.
“Rossonerlar” qator muvaffaqiyatsizliklarni boshdan kechirmoqda – so‘nggi olti o‘yinda atigi bitta g‘alaba, uchta mag‘lubiyat va ikkita durang. Biroq, Calciomercato nashrining yangilangan hisobotiga ko‘ra, Pioli hozirda iste’foga chiqish xavfi ostida emas. Shu bilan birga, klub jamoaning jarohatlar bilan bog‘liq muammolari mohiyatini o‘rganish niyatida - futbolchilarning jismoniy tayyorgarligi uchun mas’ul bo‘lgan xodimlardan biri ishdan bo‘shatilishi ehtimoli bor.
“Milan” A Seriyaning 12-turidan so‘ng peshqadam “Inter”dan 8 ochko ortda qolgan holda uchinchi o‘rinda bormoqda. 25 noyabr kuni Stefano Pioli shogirdlari o‘z maydonida "Fiorentina"ni qabul qiladi.
