APLda jami 213 golga mualliflik qilgan, uch bor "Oltin butsa" sovriniga loyiq topilgan Suares va van Persini, turnir tarixidagi eng yaxshi hujumchilardan deyish mumkin. Ushbu juftlik 2010 yillar boshini o‘z jamoalaridagi fantastik o‘yinlari bilan yoritgandi. Bugun bu ikkisining qay biri yaxshiroq bo‘lganini aniqlashga harakat qilib ko‘rmoqchimiz. Quyida bir necha mezonlar asosida hujumchilarni baholaymiz.
Gol urish
APL tarixidagi eng yaxshi hujumchi degan nomni ularga berar ekanmiz, shubhasiz Suares va van Persining gollari soniga e’tibor berishimiz kerak bo‘ladi. Robin van Persi 11 yillik Angliyadagi faoliyati davomida 144 ta golga mualliflik qilgan. Suares esa uch yarim yil ichida 69 ta gol urgan. Shu sabab bu ikkisini taqqoslash murakkab. Biz ularni solishtirish maqsadida maxsus matematik hisoblash – "daqiqasiga ӯrtacha bir gol" usulidan foydalandik. Ya’ni, futbolchilarning maydonda bo‘lgan daqiqasini urgan goliga bo‘lib yuborish. Natijada esa quyidagicha bo‘ldi:
Robin van Persi har 140 daqiqada bir gol urgan. Luis Suares esa har 139 daqiqada bir golga mualliflik qilgan. Ko‘rinib turibdiki, bu borada kichik ustunlik Suares tomonida. Shu sabab bu sohada urugvaylikni g‘olib deb topamiz.
APL sovrinlari
Agarda ushbu futbolchilarning butun karyerasini APLga qarshi qo‘yadigan bo‘lsak, Suares osonlikcha g‘olibga aylanadi. Negaki, u YECHLni yutgan, qolaversa, bir mavsum APLning yil o‘yinchisiga ham aylangan. Ammo bu maqolada biz futbolchilarning APL faoliyatigagina nazar tashlayapmiz. Shu sabab, kuchlar nisbati o‘zgaradi. Luis Suares "Liverpul" bilan Angliya chempioni bo‘la olmagan. Robin van Persi esa "MYU"ga o‘tgach, Fergyusonning so‘nggi mavsumini chempionlik bilan tugatishga yordam bergan. Shu sababli bu borada g‘oliblikni niderlandiyalik hujumchi egallaydi.
X-faktor
Agarda solishtirilayotgan futbolchilarning faoliyatiga nazar tashlasangiz, ma’lum bo‘ladiki, ularda o‘ziga xos nimadir doimo bo‘lgan. Masalan, vaqti kelsa, ularning har ikkisi o‘yin ssenariysini o‘zgartirib yubora olgan. Hech narsadan gol yasash borasida Suares va van Persining qobiliyatlariga shak-shubha bo‘lishi mumkin emas. Agarda ulardan birini tanlashga majbur bo‘lsak, Suares ma’qul ko‘riladi. Negaki, bu borada urugvaylik ustaroq edi.
Umumiy xulosa
Har ikki futbolchi ham Angliya Premyer-ligasi tarixidagi eng yaxshi top-50 ta hujumchilar sirasiga kiradi. Ularning o‘yinlari o‘z vaqtida bizga bir olam zavq bergan. Ammo ulardan birini tanlashga to‘g‘ri kelganida, yuqoridagi hisob-kitoblardan keyin Suaresga ustunlikni berish kerak bo‘ladi. Negaki, Luis Suares nafaqat Angliya, balki butun jahonning eng yaxshi hujumchilaridan biridir. U hatto hozir ham sovrinlar yutishni kanda qilmayapti.
ISMATOV J.
