Norvegiya terma jamoasi shifokori Ola Sand "Manchester Siti" hujumchisi Erling Xoland Farer orollari bilan o‘rtoqlik uchrashuvida (2:0) to‘pig‘idan jarohat olganini aytdi.

"U bir oz zaif bo‘lgan joyida to‘pig‘ini biroz qayirib oldi. Bu darhol juda og‘riqli bo‘ldi, lekin keyin juda tez o‘tib ketdi. Ertaga uning qanday holatda ekanligini ko‘ramiz", - dedi Sand VG bilan suhbatda.

Forvard o‘rtoqlik uchrashuvida zaxiradan maydonga tushdi va o‘yin tugashiga bir necha daqiqa qolganida jarohat oldi. Norvegiya terma jamoasi shifokorining aniqlik kiritishicha, Erling avvallari muammosi bo‘lgan to‘pig‘ini jarohatlagan.

Joriy mavsumda Xoland “Manchester Siti” safida 18 ta o‘yinda maydonga tushib, 17 ta gol va 4 ta golli uzatmaga mualliflik qilgan. Ayni damda Premyer-liganing 12 o‘yinidan so‘ng "Manchester Siti" 28 ochko bilan birinchi o‘rinda bormoqda.