Eron terma jamoasi bosh murabbiyi Antonio Manikone O‘zbekistonga qarshi bo‘lib o‘tadigan JCH saralash uchrashuvi oldidan o‘z fikrlarini bildirdi.

"Bosh murabbiyimiz Amir Galinoi betob ekanligini sababli matbuot anjumanida ishtirok eta olmaydi. O‘zbekiston terma jamoasini yaxshi bilamiz, ular ajoyib jamoa. Ertangi o‘yin ajoyib o‘tadi.

CAFA finalida o‘yin ajoyib bo‘lgan edi. Shundan buyon jamoalar darajasi deyarli o‘zgarmagan. O‘zbekiston Osiyoda yuqori darajada futbol namoyish etadigan jamoa bo‘lgan, Srechko Katanes shogirdlari doim chiroyli o‘yin ko‘rsatib kelishgan. Umid qilamanki, ertaga chiroyli o‘yin guvohi bo‘lamiz

Jamoamiz himoyaviy o‘yin ko‘rsatadi deb o‘ylamayman. Biz so‘nggi o‘yinlarda ko‘p gol uryapmiz, futbol aql bilan o‘ynaladigan o‘yin, unda ba’zida hujumda, ba’zida himoyada yaxshi harakat qilish talab etiladi. Amir Galinoi ertangi o‘yinda ishtirok etadi. Bu borada muammo yo‘q.

Jahonbashning jarohat olgani rost. Umid qilamanki, jarohatlar o‘yinimizga ta’sir qilmaydi".

Said Izzatullohi (futbolchi):

"Yuqorida aytib o‘tilganidek, murabbiyimiz biroz betob bo‘lgani sababli bugungi matbuot anjumanida ishtirok eta olmadi. Amir Galinoi kasal bo‘lishiga qaramasdan O‘zbekistonga tashrif buyurdi, undan bizni qo‘llab-quvvatlayotganidan minnatdormiz. JCH saralashlarida birlamchi o‘yinlar qiyin bo‘ladi. Gongkong bilan shunday qiyin o‘yin o‘tkazdik, ertaga ham shunday bahslardan biri bo‘ladi.

Shomurodov bilan bir jamoada o‘ynash baxtiga muyassar bo‘lganman. U katta tajribali futbolchi, Eldor nafaqat O‘zbekistonda balki butun Osiyoda eng kuchli hujumchilar qatoriga kiradi. Biz Eldor va terma jamoa o‘yinini o‘rgandik, ularga qarshi yaxshi o‘yin ko‘rsatamiz degan umiddamiz.

Biz futbolchilar maydonda diplomatiyaga hech qachon e’tibor bermaymiz. Maydonda faqat raqibga e’tibor qaratamiz. O‘zbek futbolidagi o‘zgarishlar e’tiborga molik, bularni Yevropada to‘p tepayotgan futbolchilar bilan ham ko‘rishimiz mumkin. O‘zbekiston har doim bizning eng qiyin raqiblarimiz bo‘lib qoladi".