Ayni kunlarda jahonning 14-16-18 yosh kategoriyasidagi eng yaxshi shaxmatchilari Italiyada bo‘lib o‘tayotgan «Shaxmat bo‘yicha yoshlar o‘rtasidagi jahon chempionati»da ishtirok etmoqda.

Jahon chempionatida 92 ta davlatdan 217 ta unvonli shaxmatchilar ishtirok etmoqda. Jami 766 nafar shaxmatchi yigit-qizlar ishtirok etayotgan turnirda o‘zbekistonlik 3 nafar shaxmatchi vatanimiz sharafini himoya qilmoqda.

Kecha 14 yoshgacha bo‘lgan qizlar o‘rtasidagi 10-tur bahslarida hamyurtimiz Afruza Hamdamova (2199) rossiyalik Anna Shuxman (2263)ga qarshi bahs olib bordi. Hamyurtimiz o‘yin davomida qiyin vaziyatga tushib qolganiga qaramay, nafaqat undan chiqib ketdi, balki bahsni g‘alaba bilan yakunlashga muvaffaq bo‘ldi.

Natijada Hamdamova 9 o‘yinning barchasida g‘alaba qozonib, o‘z ochkolarini 9taga yetkazib oldi. E’tiborli tomoni, Afruza 1-tur o‘yiniga yetib bora olmagani uchun raqiblaridan bitta o‘yin kam o‘tkazishga majbur bo‘lmoqda.

Bugun bo‘ladigan so‘nggi tur natijasidan qat’i nazar Afruza Hamdamova jahon chempionligini qo‘lga kiritdi. Boisi, 8 ochko bilan 2-o‘rinni egallab turgan qozog‘istonlik Elnaz Qaliahmet ham vatandoshimizga yutqazgan. Musobaqa reglamentiga ko‘ra, ochkolar teng kelib qolganda dastlab o‘zaro o‘yin inobatga olinadi.

Shu sababli, Afruza Hamdamova muddatidan avval 14 yoshgacha bo‘lgan qizlar o‘rtasida jahon chempioniga aylandi. Qizlar o‘rtasida jahon chempioni egasi O‘zbekiston tarixida ilk bor paydo bo‘ldi.

Shu paytga qadar Gulruhbegim Tohirjonova va Bahora Egamberdiyeva mos ravishda yosh toifalarida jahonning vise-chempionligiga erishgan.