Noyabr FIFA kunlaridan keyin, reytingdagi e’tiborga molik o‘zgarishlar:
- Eng ko‘p ball va eng katta sakrash: Komor orollari JCH-2026 saralashi doirasida, o‘z maydonida Markaziy Afrika Respublikasi hamda Gana terma jamoalarini mag‘lub etib, umumiy hisobda 30.88 ball ishlab oldi va FIFA reytingida 8 pog‘ona tepaga ko‘tarilib, 128-o‘rindan 120-o‘ringa chiqib oldi.
- Eng ko‘p yo‘qotish: Shveysariya Yevro-2024 saralashi doirasida, safarda Isroil bilan va o‘z maydonida Kosovo bilan durang o‘ynadi. Shuningdek, safarda Ruminiyaga imkoniyatni boy berib, umumiy hisobda, 31.94 balldan mahrum bo‘ldi.
- Eng chuqur sho‘ng‘ish: Peru va Gambiya. JCH-2026 saralashi doirasida, Peru safarda Boliviyaga mag‘lub bo‘ldi va o‘z maydonida Venenuela bilan durang o‘ynadi. Gambiya esa safarda Burundiga va o‘z maydonida Kot-d’Ivuarga mag‘lub bo‘ldi. Har ikkala terma jamoa 9 pog‘ona pastga sho‘ng‘ib, Peru 26-o‘rindan 35-o‘ringa, Gambiya esa 117-o‘rindan 126-o‘ringa tushib ketishdi.
- Osiyodagi eng katta sakrash: Malayziya o‘z maydonida Qirg‘iz Respublikasi va safarda Xitoy Taypeyini mag‘lub etgan holda 26.14 ball bilan 7 pog‘ona tepaga ko‘tarilib, 137-o‘rindan 130-o‘ringa chiqib oldi. Keyingi o‘rinlarni 5 ta pog‘ona yuqorilagan O‘zbekiston, Iroq va BAA terma jamoalari qayd etishgan.