"Nyukasl" futbolchisi Kiran Trippyerning fikricha, Chempionlar ligasi guruh bosqichidan o‘rin olgan "Nyukasl" - "PSJ" (1:1) uchrashuvida hakamlar penalti belgilab, xatoga yo‘l qo‘ygan.

"Men futboldan zavq olishga harakat qilaman va bu masalalarni muhokama qilishdan charchadim. Qaror har doim hakam tomonidan qabul qilinadi. U monitorga borish imkoniyatiga ega bo‘ldi, u buni qildi. Shunchaki tushunmayapman, u to‘pning ko‘kragidan tushib, Livramentoning qo‘liga sirpanib tushganini ko‘rishi kerak edi. Men shu yerda turib, ushbu qarorlarni muhokama qilyapman, nega uchrashuv rasmiylari buni qila olmaydi? Nega hakam chiqib, nega bu penalti belgilaganini tushuntira olmaydi? Bugun barcha yigitlarimiz bor kuchlarini berishdi. Bu penalti emasligini hamma ko‘rdi", - dedi Trippyer The Independent bilan suhbatda.

Chempionlar ligasi doirasidagi "Nyukasl" – "PSJ" uchrashuvi so‘ngida parijlik futbolchi Usmon Dembele "qarg‘alar" jarima maydonchasi ichida to‘p uzatishga urinib, himoyachi Valentino Livramentoga zarba berdi. To‘p ingliz futbolchisining tanasidan chiqib, tirsagiga tegdi. Bosh hakam Shimon Marchinyak videotakrorni tomosha qilib, penalti belgiladi va uni Kilian Mbappe golga aylantirdi.