OKMK bosh murabbiyi Mirjalol Qosimov Superliganign 26-turi doirasida bo‘lib o‘tgan "Nasaf"ga qarshi o‘yin (1:1) borasida o‘z fikrlari bilan o‘rtoqlashdi.

"G‘alaba qozonishni juda ham istagandik. Chempionatni ijobiy natija bilan tugatish niyatida edik. Yil davomida ko‘p o‘yin o‘tkazdik, asabiylashishlar ko‘p bo‘ldi. Superliga tugadi, hamma charchagan edi. Endi ozgina dam olishimiz kerak. Ammo ikkinchi o‘rinni olishga imkonimiz bor edi. Fursatdan foydalanib, o‘z muxlislarimizga, futbolchilarimizga minnatdorchiligimni bildirib qolaman.

Bugungi uchrashuv juda ham qiziqarli bo‘ldi. Sariq kartochka, qizil kartochkalar ham bo‘ldi. Shunga qaramay, durang natija qayd eta oldik.

Hakamlarni o‘z reglamenti va qarorlarini baholaydiganlar bor. Biz har qanday vaziyatga tayyor turishimiz kerak. Ularning ishini tahlil qilib o‘tirmoqchi emasman.

Mavsum yarmidan so‘ng juda ko‘p yo‘qotishlarga uchradik. Jarohatlar asosiy muammomizga aylandi. 70 foiz shogirdlarim muhim pallada jamoaga yordam bera olmadi.

Oxirgi turda ham 2-o‘rin olish uchun imkonimiz bor edi. Umumiy olib qarasak, yomon mavsum o‘tkazmadik, deb o‘ylayman. OCHLni hisobga olmaganda, albatta.

Keyingi mavsum katta o‘zgarishlar bo‘ladimi? 4 dekabrda chempionlar ligasi doirasida o‘yinimiz bor. Ungacha esa hammasini vaqt ko‘rsatadi", — dedi Mirjalol Qosimov.