"Atletiko Paranaense" hujumchisi Vitor Roke yaqin orada Yevropaga ko‘chib o‘tishga tayyorlanmoqda.
Yakshanbadan dushanbaga o‘tar kechasi 18 yoshli futbolchi "Barselona"ga ko‘chib o‘tishdan oldin Braziliya jamoasida ("Santos"ga qarshi) so‘nggi uy uchrashuvini o‘tkazadi, deb xabar beradi "Atletiko Paranaense" matbuot xizmati. Oldin ispan OAVlari taxmin qilganidek, forvard yanvar oyi boshida rasman “blaugrana” safiga qo‘shiladi.
Vitor Roke joriy Braziliya A seriyasida 24 uchrashuvda 12 ta gol va 3 ta golli uzatmaga mualliflik qildi. “Atletiko Paranaense” mavsum yakunlanishiga ikki tur qolganda turnir jadvalida sakkizinchi o‘rinda bormoqda.