Ikki top ingliz klubi o‘tgan yozda "Lans"dan transfer qilinganidan keyin Bundesligadagi debyut mavsumini o‘tkazayotgan "RB Leypsig" hujumchisi Lui Opendaga e’tibor qaratmoqda. Jurnalist Sasha Tavolyeri bergan ma’lumotlarga ko‘ra, 23 yoshli belgiyalik futbolchiga "Nyukasl" va "Liverpul" qiziqmoqda.
Openda Germaniya chempionatidagi ilk mavsumini yaxshi boshladi, 13 turda 10 gol va 3 golli uzatmani amalga oshirdi. O‘tgan mavsumda Lui Fransiya chempionatida 38 o‘yinda 21 gol urib, eng yaxshi to‘purarlardan biriga aylandi.
Eslatib o‘tamiz, “RB Leypsig” yozda Openda uchun 38 million yevro to‘lagan edi. Hujumchi "buqalar” tarixidagi eng qimmat transferga aylandi.