Bir qarashda, ko‘pchilik e’tiboridan chetda qolgan «Sheffild Yunayted» - «Bornmut» (APL 13-turi) o‘yinida tarixiy voqea kuzatildi.

Jastin Klyuyvert Angliya elit divizionidagi birinchi golini nishonladi va  Yevropaning kuchli 5ta ligasidan har birida raqib darvozasiga yo‘l topgan atigi 3-futbolchi bo‘ldi. Kichik Klyuyvert bunga qadar «A» seriya, Liga 1, Bundesliga va La Ligada gol quvonchini tuygandi. Mana, endi APLda ham o‘zini ko‘rsatdi va o‘ziga xos ro‘yxati to‘liq holatga keldi.

Asosiy fakt shuki, Jastin Klyuyvert bunday natijaga atigi 5 mavsum (agar top-5 ligadagi birinchi o‘yinidan hisoblasak, 6 mavsum)da erishdi. «Ayaks» tarbiyalanuvchisi sanalgan kichik Klyuyvert yoshligidan Niderlandiyaning eng iqtidorli va istiqbolli futbolchilaridan biri sanalgan, biroq 24 yoshga yetdiki, umidlarni hali oqlagani yo‘q. Har holda, Jastin tez-tez klub almashtirish bilan ovora va hali biror joyda muhim futbolchiga aylanolmadi. Hozir ham o‘z jamoasini qidirayotgandek.

Asosiysi, joriy mavsum «Bornmut» sharafini himoya qilayotgan niderlandiyalik «Sheffild» darvozasini nishonga olish asnosida futbol tarixiga kirdi. Diqqat qiling, bunga qadar Yevropaning eng kuchli 5ta ligasidan har birida gol urish atigi 2 nafar futbolchiga nasib etgandi:

Florin Raduchoyu. Ruminiyalik hujumchi shunday o‘ziga xos «kvest»ga erishgan birinchi futbolchi sanaladi. U o‘tgan asrning 90-yillari «A» seriyada «Bari», «Verona», «Breshiya» va «Milan» klublari safida to‘p surgan, keyin navbati bilan «Espanyol», «Vest Xem», «Shtutgart» va «Monako»da ko‘rinish bergan.

Stevan Yovetich. Reduchoyu natijasini 2021 yilga kelib, serbiyalik hujumchi takrorladi. Yovetich «Fiorentina», «Manchester Siti», «Inter», «Sevilya», «Monako» va «Gerta» klublarida o‘ynadi. 

Aytgancha, Jastinning otasi Patrik Klyuyvert ham bunday ko‘rsatkichga yaqin kelgan. U avvaliga «A» seriyada «Milan» uchun 6ta gol urgan, keyin La Ligada «Barselona» (90ta gol), APLda «Nyukasl» (6ta gol), Liga 1da «Lill» (4ta gol) sharafini himoya qilgan. Xullas, Patrik hisobida faqat Bundesliga belgisi ostidagi gol yo‘q. Demak, Jastin bu borada otasidan o‘zib ketishga ulgurdi, ammo uning darajasiga yetish uchun hali ko‘p ter to‘kishi kerak. Axir katta Klyuyvert futbolda mislsiz yutuqlarga erishgan, jumladan, CHLda ham g‘alaba nashidasini surgan.